Handtekinn fimm ára gamall

Mikael Torfason, rithöfundur og fyrrverandi ritstjóri DV, var handtekinn í fyrsta sinn á ævinni þegar hann var fimm ára gamall. „Ég var handtekinn í fyrsta sinn þegar ég var fimm að verða sex og strauk af leikskólanum Steinahlíð og fór heim til mín og reyndi að kveikja í stigaganginum," segir Mikael í samtali við Miðjuna, nýtt vefrit um menningu og dægurmál.

Þetta er þó ekki vandræðalegasta augnablik í lífi Mikaels því að hann greinir jafnframt frá því að einu sinni hafi verið Grease ball í skólanum hjá honum og þeir félagarnir verið í hvítum bolum, leðurjökkum og með brilljantín í hárinu. „Við ákváðum að þetta væri svo töff að við myndum mæta svona daginn eftir. Ég var sem sagt eini sem mætti þannig. Fór heim í frímínútum og skipti um föt. Þetta var vandræðalegt," segir Mikael í samtali við Miðjuna.

Það er Bryndís Ísfold Hlöðversdóttir sem ritsýrir Miðjunni. Í fréttatilkynningu vegna opnunar vefsins segir að vefurinn sé borgaralegur fjölmiðill, það þýði einfaldlega að allir notendur geti skrifað greinar, fréttir, frásagnir, gagnrýni eða tekið þátt í umræðum.