Björgólfur spenntur fyrir sumrinu

Björgólfur Takefusa æfir nú á fullu með meistaraflokki karla hjá KR eftir því sem Rúnar Kristinsson, yfirmaður knattspyrnumála hjá félaginu, segir.

Samningur Björgólfs við KR rann út í haust og hefur lengi vel verið óvíst hvort hann ætlaði að halda áfram að spila eða taka sér frí frá boltanum. Hann hefur þó áður sagt að ef hann ætlar að spila í sumar komi aðeins til greina að spila með KR.

„Björgólfur hefur verið að æfa með okkur á fullu. Hann sagði mér svo í óspurðum fréttum um daginn að hann væri orðinn mjög áhugasamur fyrir sumarið. Það er auðvitað afar jákvæðar fréttir fyrir okkur,“ sagði Rúnar.

„Hann þarf auðvitað smá tíma til að koma sér aftur almennilega af stað og því ekki enn orðið tímabært að ræða samningamál. En báðir aðilar eru mjög rólegir hvað þetta varðar. Hann treystir okkur og við treystum honum.“

Þá er einnig ljóst að Portúgalinn Jordao Diogo mun spila með KR í sumar en hann lék einnig með liðinu síðastliðið sumar.

„Hann kemur til landsins í sumar og þarf eins og Björgólfur smá tíma til að koma sér í stand. En við vildum alltaf fá hann til baka, bæði ég og Logi,“ sagði Rúnar og átti þar við Loga Ólafsson, þjálfara KR.

„Diogo er ekki dýr leikmaður og við semjum við hann í íslenskum krónum eins og við gerum við alla okkar leikmenn. Hann vildi endilega koma aftur og við vildum fá hann. Þetta var því ekki flókið mál.“