Eggert á Íslandsbryggju

Um miðjan september verður opnuð sýning með nýjustu verkum Eggerts Péturssonar í menningarmiðstöðinni Nordatlantens Brygge í Kaupmannahöfn. Sýningin tengist opnun Listamesssunnar í Höfn sem hefst um næstu helgi. Í tengslum við hana gefur bókaútgáfan Crymogea af þessu tilefni út bókina Blómalandið þar sem sýnd eru öll verk sýningarinnar og ítarlega fjallað um feril og list Eggerts. Andri Snær Magnason rithöfundur ritar burðarritgerð bókarinnar, Blómalandið, og fjallar þar um verk Eggerts í víðu samhengi listasögu, raunvísinda og umhverfisskynjunar. Sýningarstjóri er Ólöf K. Sigurðardóttir, listfræðingur og forstöðumaður Hafnarborgar, og ritar hún inngang að bókinni sem er hönnuð af Hildigunni Gunnarsdóttur og Snæfríði Þorsteins og er mjög óvenjuleg að allri gerð.

Bókin er „lífræn“ í umfangi og stærð, nánast engar blaðsíður hennar eru jafn stórar, í henni eru fjórar stórar „útfellur“ (fold-outs) og handbundin saman með þræði. Það er prentsmiðjan Prentmet sem prentaði bókina og batt hana inn. Þær Hildigunnur og Snæfríð hafa áður hannað bók um verk Eggerts sem kom út í tilefni af yfirlitssýningu hans á Kjarvals­stöðum árið 2007 og bókina Flora Islandica, safn teikninga Eggerts af íslenskum háplöntum, sem Crymogea gaf út 2008. Fyrir hönnun þeirrar bókar hlutu þær verðlaun í flokki grafískrar hönnunar fyrir prentmiðla í árlegri samkeppni FÍT og silfurverðlaun í flokki bóka og bæklinga í samkeppni evrópskra hönnuða, Art Directors Club of Europe, í Barcelona í júní 2009.

Sýningin á verkum Eggerts í Nordatlantens Brygge stendur frá 17. september 2009 til 3. janúar 2010. Öll verkin eru olíumálverk og unnin á síðustu tveimur árum. Fyrir verk sín hefur Eggert öðlast ýmsar viðurkenningar, til dæmis silfurverðlaun Carnegie Art Award árið 2006 og unnið sér sess sem einn kunnasti og dáðasti samtímalistamaður Íslendinga.

Bókin er á þremur tungumálum: íslensku, dönsku og ensku. Kim Lembeck þýddi textana á dönsku og Anna Yates á ensku. Bókin er til sölu í bókabúðum á Íslandi og í Danmörku og fæst einnig hjá útgefanda, Crymogeu, í verslun forlagsins að Barónsstíg 27.- pbb