Selja eigur sínar og halda út í heim

Svo virðist sem kreppan sé tími ævintýra og hafa vinkonurnar Áslaug Rán Einarsdóttir, eða Ása eins og hún er kölluð, og Anita Hafdís Björnsdóttir ákveðið að hætta í vinnu sinni, selja eigur sínar og halda á vit ævintýranna.

Stúlkurnar stunda báðar svifvængjaflug af kappi og næstu tvö árin ætla þær að ferðast um heiminn og stunda íþróttina. Samhliða fluginu hafa þær þó sett á laggirnar verkefni sem kallast The Flying Effect til að vekja athygli á frelsismálum kvenna á heimsvísu. Verkefnið er unnið í samstarfi við UNIFEM á Íslandi.

„Þetta byrjaði allt með svifvængjafluginu. Það er erfitt að lýsa því með orðum hvað gerist þegar maður flýgur, en heimurinn og hvernig maður skynjar hann breytist. Maður verður frjáls eins og fuglinn. Við vorum að velta fyrir okkur þessari frelsistilfinningu og í kjölfarið fórum við að spá í hversu misfrjálst fólk er og hvernig fólk túlkar frelsi. Þetta varð svo grunnur­inn að verkefninu," útskýrir Ása. Hún segir það hafa verið lítið mál að taka þá ákvörðun að halda út í óvissuna. „Fjárhagslega er þetta svolítið erfitt, en það var ekki erfið ákvörðun að fara. Það er ákveðinn léttir að losa sig við alla þessa óþarfa muni sem maður hefur sankað að sér í gegnum tíðina, þó að það sé erfitt að láta frá sér einstaka hluti."

Stúlkurnar halda út í byrjun desember og verður Nepal fyrsti áfangastaður þeirra og þaðan halda þær meðal annars til Indlands, Ástralíu og Austur-Evrópu. „Samhliða fluginu ætlum við að hitta konur í hverju landi og gefa þeim tækifæri á að ávarpa heiminn í gegnum teikningar, ljóð, bréf eða myndir. Við notum svo þetta efni til að setja upp sýningar á þeim stöðum sem við komum til," segir Ása.

Áætlað er að Ása og Anita snúi heim næsta sumar og setji upp sýningu á verkefninu áður en þær halda aftur út í hinn stóra heim. Stúlkurnar eru að leita eftir styrktar­aðilum fyrir verkefnið og segir Ása að þær geti unnið eitthvað í skiptum. „Við erum báðar menntaðir grafískir hönnuðir þannig við getum tekið að okkur verkefni fyrir mögulega styrktaraðila."

Hægt er að fylgjast með verkefninu á vefsíðunni www.theflying­effect.wordpress.com.

sara@frettabladid.is