Þór/KA fær liðsstyrk - Podovac komin frá Fylki

Þór/KA náði sínum besta árangri í sögu félagsins í efstu deild kvenna í fótbolta í sumar þegar Norðanstúlkur enduðu í þriðja sæti í Pepsi-deildinni en Þór/KA er strax byrjað að styrkja sig fyrir átökin næsta sumar.

Miðjumaðurinn Danka Podovac gekk í dag formlega í raðir Þór/KA en hún kemur frá Fylki. Podovac er 27 ára gömul og kemur frá Serbíu en hún hefur stimplað sig inn undanfarin ár sem einn besti miðjumaður efstu deildarinnar og er því mikill liðsstyrkur fyrir Þór/KA.

Podovac hefur alls skorað 36 mörk í 73 leikjum með Fylki og Keflavík í efstu deild og VISA-bikarnum síðustu fjögur tímabilin.