Ráða lögfræðing vegna deilu við Háskóla Íslands

Félag prófessora við ríkisháskóla hafa ráðið Ragnar Tómaas Árnason lögfræðing til þess að gæta hagsmuna og réttinda félagsmanna vegna ákvörðunar Háskóla Íslands um að auka kennsluskyldu kennara og minnka rannsóknarskyldu þeirra. Félagið telur að þarna sé um kjarabundin starfsréttindi að ræða.

Aukin kennsluskylda leggst illa í prófessora sem hafa mótmælt breytingunni. „Það er auk þess ótrúleg óskammfeilni að tilkynna kennurum HÍ að kennsla þeirra verði stórlega aukin með þriggja daga fyrirvara í miðju jólaleyfi," segir Gísli Már Gíslason, formaður Félags prófessora við ríkisháskóla, í tölvubréfi sem sent var á starfsmenn Háskóla Íslands fyrr í dag.

Kristín Ingólfsdóttir, rektor Háskóla Íslands, sagði í Fréttablaðinu í dag að skólinn hafi stækkað um þriðjung frá því í haust og skólinn þurfi á starfsmönnum sínum að halda. Áformum vegna rannsóknarsamnings við stjórnvöld verði að hluta frestað. Tilfærslur verða á starfsskyldum hjá ákveðnum hópum. Kennsluskyldan eykst og rannsóknarskyldan minnkar hjá kennurum, einkum prófessorum. Misjafnt er eftir aldri og afköstum hversu mikið þetta er. „Þetta eru talsvert margir, sennilega 150 manns. Við skerum niður um 120 milljónir með þessum tilfærslum," sagði Kristín í Fréttablaðinu.

Gísli segir í tölvupóstinum að skammt sé síðan að yfirstjórn Háskóla Íslands hafi mótað þá stefnu að skólinn skuli verða í hópi 100 bestu háskóla samkvæmt svokölluðum Sjanghæ mælikvarða. Til að komast í hóp þeirra 100 bestu þurfa háskólar að uppfylla kröfur um birtingar í alþjóðlegum vísindaritum, útskrifa ákveðinn fjölda doktora á ári og uppfylla fleiri rannsóknatengdar kröfur.

„Það er því augljóst að til þess að komast ofar á þennan lista, þurfa kennarar skólans að leggja sig alla fram við rannsóknir og leiðbeiningu doktorsnema. Því skýtur skökku við þegar aukin er kennsla hjá þeim prófessorum sem eru fremstir í rannsóknum án þess að það sé einu sinni athugað hver skipting vinnutíma í kennslu og rannsóknir er í skólum sem eru í efsta hluta Sjanghæ skrárinnar," segir Gísli.

Ekki náðist í Gísla vegna málsins.