Evrópumeistararnir komu Englendingum niður á jörðina

Enska landsliðið hefur verið á ágætu róli undanfarin misseri undir stjórn Fabio Capello en mátti sín lítils í 2-0 ósigri gegn Spánverjum í vináttuleik þjóðanna í Sevilla.

Gabriel Agbonlahor átti fyrsta færi enska liðsins í leiknum en það voru Spánverjar sem náðu forystu í leiknum með frábæru marki frá hinum eitraða David Villa.

Villa fór illa með þá John Terry og Phil Jagielka áður en hann þrumaði boltanum í netið og það var svo hinn ungi Fernando Llorente sem gulltryggði sigur Spánverja með sínu fyrsta marki fyrir Spán í öðrum landsleik sínum.

Það eina jákvæða við leikinn hjá Englendingum var það að David Beckham spilaði þarna sinn 108. landsleik og jafnaði þar með met Bobby Moore yfir flesta landsleiki útileikmanns fyrir Englendinga.

Þetta var fyrsti landsleikurinn sem Spánverjar spila í Sevilla í áratug og var þetta 29. leikur liðsins í röð án taps.

Fjöldi vináttulandsleikja fór fram í dag og í kvöld og þar á meðal má nefna að Argentínumenn héldu áfram góðu gengi undir stjórn Diego Maradona með 2-0 sigri á Frökkum í Marseille.

Newcastle-maðurinn Jonas Guiterrez og undrabarnið Lionel Messi frá Barcelona skoruðu mörk Argentínumanna í leiknum, sem þótti fast spilaður af vináttuleik að vera.

Norðmenn gerðu góða ferð til Dusseldorf þar sem þeir unnu 1-0 útisigur á Þjóðverjum með marki Christian Grindheim á 63. mínútu. Þetta var annað tap Þjóðverja á heimavelli í röð eftir að þeir töpuðu fyrir Englendingum á síðasta ári.

Eduardo da Silva hélt upp á endurkomu sína í króatíska landsliðið með því að leggja um sigurmark Niko Kranjcar í 2-1 sigri liðsins á Rúmenum.

Cristiano Ronaldo tryggði Portúgölum 1-0 sigur á Finnum með marki úr vítaspyrnu og Wales mátti sætta sig við 1-0 tap fyrir Pólverjum í Varsjá þrátt fyrir að vera sterkari aðilinn í leiknum.