Sjötíu ár frá upphafi heimsstyrjaldar

Sjötíu ár eru í dag frá upphafi síðari heimsstyrjaldarinnar en hún hófst með innrás Þjóðverja í Pólland 1. september 1939. Styrjöldinni lauk með uppgjöf Japana í ágúst 1945 og höfðu þá um 60 milljónir manna týnt lífinu. Minningarathöfn um hina föllnu verður haldin í Gdansk í Póllandi í dag og munu Angela Merkel kanslari og Vladimír Pútín, forsætisráðherra Rússlands, verða meðal þeirra sem hana sækja. Eins og fram kom í fréttum í gær hafa Pólverjar farið fram á að Pútín biðjist afsökunar á samkomulagi nasista og Sovétmanna árið 1939 og er ræðu Pútíns beðið með eftirvæntingu.