Olíuskattar Íslands draga úr áhuga á Drekaútboðinu

2. apríl 2009 18:45

Áformuð skattheimta íslenskra stjórnvalda af olíuvinnslu hrekur olíufélög frá því að taka þátt í Drekaútboðinu. Þetta segir forstjóri norsks olíufélags sem spáir því að umsækjendur verði teljandi á fingrum annarrar handar þegar fresturinn rennur út þann 15. maí.

Alþingi samþykkti fyrir jól skattalöggjöf sem gerir ráð fyrir að íslenska ríkið fái allt að 59 prósent af tekjum olíuvinnslunnar. Þótt þetta sé lægra hlutfall en Norðmenn taka hæst virðist svokallað vinnslugjald angra menn í olíuheiminum, en það leggst á áður en hagnaður myndast af olíuvinnslunni. Terje Hagevang hjá Sagex Petrolium líkir þessu við að Íslendingar ætli sér bita af kökunni áður en búið sé að baka kökuna. Venjan sé hjá stjórnvöldum að leyfa kökunni að bakast fyrst og síðan að skipta henni. Hann telur að Íslendingar hefðu fremur átt að afrita löggjöf Færeyinga en finna upp nýtt skattkerfi.

Spurður hvort skattalöggjöf Íslendinga verði hindrun í vegi þess að olíufélög taki þátt í útboðinu svarar Terje Hagevang játandi. Skattheimtan ásamt heimskreppunni valdi því að snarlega hafi dregið úr áhuga á Drekaútboðinu frá því í haust. Á þeim tímapunkti hefðu tíu til tólf félög haft áhuga en nú telji hann að þau verði teljandi á fingrum annarrar handar.

Hans Henrik Ramm er einn kunnasti ráðgjafi Noregs í olíumálum, og hefur meðal annars verið þingmaður á Stórþinginu, og gegnt stöðu aðstoðarolíumálaráðherra. Hann telur að minnst eitt, kannski tvö norsk olíufélög taki þátt í Drekaútboðinu í fyrstu umferð en svo fleiri síðar.

Hann segir að í norska olíuiðnaðinum fylgist menn spenntir með útboði Íslendinga menn telji Drekasvæðið erfitt en afar spennandi. Þar sé hafdýpi mikið, langt sé til lands, jarðfræðin sé krefjandi og olíuleit og vinnsla þar krefjist bestu fáanlegu tækni. Þarna séu hins vegar miklir möguleikar, sem norskur olíuiðnaður vilji fyrir alla muni setja tennurnar í.

Tengdar fréttir

Spáir því að Íslendingar verði olíuþjóð

Íslendingar eiga eftir að verða olíuþjóð, segir helsti sérfræðingur Noregs í Jan Mayen svæðinu, og líkir því við verðmætustu olíusvæði heims. Nýjustu hljóðbylgjumælingar sem gerðar voru á Drekanum í fyrra lofa góðu og mikill áhugi er meðal olíufélaga að kaupa upplýsingarnar.

30. mars 2009 19:00

Olíuleit skapar störf norðaustanlands

Fjöldi starfa gæti skapast á norðausturhorni Íslands á næstu árum, verði ráðist í olíuleit á Drekasvæðinu. Bara þyrluþjónusta við olíuborpalla kallar á tugi starfsmanna.

1. apríl 2009 20:44

Olían lekur upp úr Drekasvæðinu

Gervihnattamyndir benda til þess að olía leki af hafsbotni og til yfirborðs á bletti sunnarlega á Drekasvæðinu. Þetta kom fram á ársfundi Orkustofnunar í Reykjavík í dag. Bresk-hollenskt fyrirtæki, sem sérhæfir sig í olíu- og málmleit með gervihnöttum, fann olíulekann nýlega en hann þykir styrkja vísbendingar um að olíu sé að finna á Drekanum.

31. mars 2009 19:15

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.