Pálmi Rafn skoraði mikilvægt útivallarmark í kvöld

Pálmi Rafn Pálmason skoraði mikilvægt mark fyrir Stabæk í undankeppni Meistaradeildarinnar í kvöld þegar liðið tapaði 1-3 á útivelli fyrir danska meisturunum í FC Kaupmannahöfn.

Pálmi Rafn minnkaði muninn á 58. mínútu á laglegan hátt eftir að hafa fengið sendingu frá Japananum Daigo Kobayashi. Pálmi Rafn spilaði á hægri vængnum í þessum leik.

Kaupmannahafnarliðið komst í 2-0 í fyrri hálfleik með mörkum frá Jesper Grönkjær og César Santín. César Santín skoraði síðan annað mark sitt úr vítaspyrnu tíu mínútum fyrir leikslok.

Seinni leikur liðanna fer fram í Noregi í næstu viku.