Á Ísland langbestu stuðningsmennina á EM í Finnlandi?

Heimasíða Knattspyrnusambands Íslands hefur komist að því að það sé samdóma álit allra þeirra sem fylgjast með EM kvennalandsliða í Finnlandi að íslensku stuðningsmennirnir séu þeir langbestu í keppninni. Íslendingar hafa fjölmennt á leiki íslenska liðsins í Tampere og Lahti og haldið uppi frábærri stemmningu í stúkunni svo eftir er tekið.

Íslenska stuðningssveitin var sérstakleg öflug á Lahden-leikvanginum í Lahti þegar íslenska liðið mætti Norðmönnum á fimmtudagskvöldið.

Íslensku áhorfendurnir sungu og trölluðu allan tímann, sungu þjóðsönginn hárri röddu, hina og þessa söngva á meðan leik stóð og hylltu síðan allir sem einn stelpurnar í leikslok þrátt fyrir að leikurinn hafi tapast.

Stelpurnar voru líka í skýjunum með stuðninginn enda ekki oft sem íslenska kvennalandsliðið spilar erlendis þar sem áhorfendur standa við bakið á þeim eins og á heimavelli.

"Fulltrúar finnsku skipulagsnefndarinnar og UEFA hafa á orði við liðstjórn íslenska liðsins að þessi stemmning sé einstök og það sé stórmerkilegt að fámennasta landið í keppninni skuli eiga svona stóran hóp öflugra stuðningsmanna, fólk á öllum aldri, allir bláklæddir, syngjandi og trallandi íslenska hvatningar- og ættjarðarsöngva," segir í frétt á heimasíðu KSÍ.