Joly hrósar sérstökum saksóknara

Fjallað er um Ólaf Þór Hauksson, sérstakan saksóknara, á vef breska dagblaðsins Financial Times í dag. Þar hrósar Eva Joly, ráðgjafi sérstaks saksóknara, Ólafi og segir hann heiðarlegan, vinnusaman og búa yfir staðfestu.

Joly tekur sem sem dæmi að þrátt fyrir að Ólafur búi á Akranesi hafi hann aldrei verið lengur en hálfan dag í burtu frá skrifstofu embættis sérstaks saksóknara sem er í Reykjavík.

Þá kemur fram í fréttinni að Joly telji að rannsókn á bankahruninu muni taka tæplega fimm ár.

Í frétt dagblaðsins segir að einhverjir efist um getu Ólafs til að takast á við rannsókn á bankahruninu. Bent er á að hann hafi áður verið sýslumaður í 6500 manna bæjarfélagi. Rætt er við Ólaf sem er hvergi banginn og telur sig hafa vaxið í starfinu að undanförnu. Hann segir brýnt að fólk sýni þolinmæði. Starfsmenn embættisins vinni hörðum höndum og sjái brátt heildarmyndina.

Frétt Financial Times er hægt að lesa hér.