Líkti Svavari við Jack Black

Breski tónlistarmálarinn Kilford sem málaði á tónleikum For a Minor Reflection á Nasa fyrir skömmu líkir Svavari Knúti við Hollywood-leikarann og söngvarann Jack Black á bloggsíðu sinni.

„Þetta er ekki óalgengt. Ég er að fá svolítið af þessu, Philip Seymour Hoffman, Oliver Platt og Jack Black," segir trúbadorinn Svavar Knútur. Kilford lætur allt flakka á blogginu um upplifun sína af tónleikum Svavars Knúts: „Ég gekk inn á þennan stað og forsprakkinn var í rosalega ljótri peysu og ég hugsaði með mér að hann hlyti að vera að stikna úr hita," skrifar Kilford.

„Ég hafði gaman af þessum strákum. Söngvarinn minnti mig rosalega mikið á Jack Black og var greinilega með sama sjálfstrausts-genið og hann. Hann lifði sig líka virkilega inn í sönginn. Trommarinn var líka frábær og hætti ekki að brosa, sem fékk mig til að brosa. Bassaleikaranum var líka alveg sama um allt og gerði bara sína hluti óaðfinnanlega."

Svavar hefur gaman af samlíkingunni og viðurkennir að líkindin með honum og Jack Black séu til staðar. „Þybbinn með skegg og líka svona nett ofvirkur," segir hann um sjálfan sig. „Ég er samt með allt öðruvísi lagasmíðar en hann. Ég ber fulla virðingu fyrir Tenacious D [hljómsveit Jacks Black] en mér finnst þeir svolítið barnalegir," segir hann. „En ég hef ógeðslega gaman af Jack Black. Hann er einn af mínum uppáhaldsleikurum. Það er skemmtilegt að eiga sér tvífara, sérstaklega af því að það eru margir taktar sem eru svipaðir. Ég hef bara gaman af þessu og tek þetta ekkert alvarlega."

Svavar hefði þó frekar kosið að vera líkt við tónlistarmann á borð við Nick Drake, sem hann hefur mikið dálæti á. „Ef Nick Drake hefði verið þybbinn og með skegg þá væri það kannski séns."

Kilford hefur á farsælum ferli sínum málað þekkta flytjendur á borð við Damon Albarn, Robert Plant, Black Eyed Peas, Kasabian og Brian Eno. Hver veit nema Svavar Knútur verði næst fyrir valinu, eftir hið vel heppnaða málverk á tónleikum For a Minor Reflection.

„Mér fannst þetta ógeðslega flott. Ég horfði á þetta og hugsaði með mér: „Þetta vil ég gera"," segir Svavar um frammistöðu Kilfords.