Októberfest að hefjast í Háskóla Íslands

Dagana 8. - 10. október mun Stúdentaráð Háskóla Íslands í samstarfi við AM-Events halda árlegt Októberfest fyrir framan Aðalbyggingu Háskóla Íslands.

Þetta kemur fram í tilkynningu frá Stúdentaráði. Þar segir að hátíðin hafi fyrst verið haldin af nemum í þýskudeild HÍ. Þá hafi hátíðin verið smá í sniðum en engu að síður var markmiðið það sama, drekka bjór og skemmta sér saman.

„Fyrst um sinn voru það þýskunemar og vinir þeirra sem komu saman og skemmtu sér. Hátíðin hefur vaxið frá því að vera nokkra manna hátíð yfir í það að verða stærsti og viðamesti atburður íslenskra háskólanema. Í ár verður ekkert slegið af og er gert ráð fyrir met aðsókn."

Að þessu sinni mun hátíðin spanna 3 kvöld. Dagskráin hefst á fimmtudagskvöldið 8. október kl 19:00 með Október"rokk"festi þar sem fram koma:

- Árstíðir

- Soundspell

- Lights on the highway

- Who Knew

- Króna

- Hoffman

- Mammút

- Dikta

- Ensími

Á föstudeginum 9. október opnar tjaldið kl 18:00 en þá mun hið hefðbundna Októberfest fara fram. Hægt verður að fá þýskt góðgæti eins og bratwurst, sauerkraut, bretzel ofl.Þýskir eðaltónar munu hljóma um tjöldin og munu skemmtilegar uppákomur eins og mottu-og búningakeppni setja sinn svip á kvöldið. Þess ber að geta Íslandsmet í bjórdrykkju var sett á októberfest 2008 og er það einlægt markmið hátíðarhaldara að slá fyrra met.

Lokadagur hátíðarinnar er svo laugardagurinn 10. október þar sem hið sögulega atburður mun eiga sér stað að fyrsta alvöru sveitaballið í aldir verður haldið í póstnúmerinu 101. Þá munu gleðigjafarnir í Skítamóral halda upp stuðinu fram eftir nóttu. Svo skemmtilega vill til að þeir halda um þessi upp á 20 ára sveitaballs afmæli.

Armband fyrir alla þrjá dagana kostar litlar 2500 krónur og boðið verður upp á bjór á stúdentaverði. Þess ber að geta að uppselt var á hátíðina 2007 og 2008. Miðasala hefst þriðjudaginn 6. október á Háskólatorgi.