Innistæður tryggðar að fullu þar til annað verður ákveðið

„Yfirlýsingar fyrri og þessarar ríkisstjórnar eru í fullu gildi þangað til annað er boðað," sagði Steingrímur J. Sigfússon fjármálaráðherra þegar hann var spurður að því, á Alþingi í dag, hvort allar innistæður yrðu tryggðar að fullu, umfram það sem tryggingasjóður ábyrgist. Spurningin var borin upp í tilefni af því að samningar hafa verið gerðir sem fela í sér að erlendir kröfuhafar eignast bankana.

Steingrímur sagði að það væri hins vegar mikilvægt að hafa það í huga að þetta væri hluti af tímabundnum og sérstökum aðstæðum og fyrr eða síðar myndi þetta koma til endurskoðunar og færast yfir í það framtíðarfyrirkomulag sem hér verði um innistæðutryggingar og fjármálakerfið í heild.