Bankar geri ekki út á 100 prósent ríkisábyrgð til frambúðar

Indriði H. Þorláksson, aðstoðarmaður fjármálaráðherra, segir líklegt að innistæðutryggingakerfið hér á landi verði endurskoðað í samræmi við heildarendurskoðun á umgjörð innistæðutrygginga í Evrópu í framtíðinni.

Hann telur ljóst að ekki sé vænlegt ástand til frambúðar að bankar geri út á hundrað prósent ríkisábyrgð innistæðna.

Lögfest er ábyrgð Tryggingasjóðs innistæðueigenda á öllum innistæðum allt að tuttugu þúsund evrum, um 3,6 milljónir króna.

Þá segir Indriði að yfirlýsingar stjórnvalda um að staðið sé á bak við allar innistæður að fullu standi enn óbreytt.

Sú yfirlýsing hafi þó, líkt og sambærilegar yfirlýsingar í öðrum löndum, verið gefnar út í ljósi hins óvenjulega ástands í heiminum.

„Einhvertíman hljóta menn að endurskoða þetta. Það hlýtur þá að gerast í samræmi við einhverskonar heildarendurskoðun á þessu tryggingakerfi í Evrópu. Við erum ekki eyland að þessu leyti," segir Indriði að lokum.