Gaman að skora - en það er ekki mitt hlutverk

Þórunn Helga Jónsdóttir opnaði markareikning sinn með brasilíska liðinu Santos um síðustu helgi þegar hún skorað eitt marka liðsins í 11-0 sigri á Brasileirinho en Þórunn kom sínu liði í 6-0. Þetta var leikur í fyrstu umferð Paulista-mótsins þar sem félög frá São Paulo héraðinu keppa.

Þórunn vill ekki gera mikið úr markinu sínu. „Markið sjálft var ekki sérlega merkilegt fyrir utan að það var fyrsta markið mitt. Boltinn barst út í teig til mín og ég skaut viðstöðulaust, enda greið leið að markinu," sagði Þórunn og bætti við.

„Það var auðvitað gaman að opna markareikninginn hér og alltaf gaman að skora, en það er satt að segja ekki mitt hlutverk hér að skora mörk," segir Þ'orunn.

„Ég spila sem "volante" fyrir framan vörnina og hef mjög afmarkað hlutverk: vinna eða fá boltann og koma honum með sem fæstum snertingum í sóknina. Helst í fyrstu snertingu eða annarri snertingu en á þriðju snertingu fær maður illt augnaráð hjá Kleiton þjálfara," segir Þórunn.

„Ég held ég fengi ábyggilega langt frí úr byrjunarliðinu ef ég færi að leggja einhverja áherslu á að skora.Það er reyndar mjög gott að spila fyrir Kleiton, því maður er aldrei í neinum vafa til hvers er ætlast og hvernig maður er að standa sig," segir Þórunn.