Fá Valencia á gjafverði

Dave Whelan, stjórnarformaður Wigan, telur að Manchester United muni fá Antonio Valencia á gjafverði ef leikmaðurinn fer til United í sumar.

Whelan mun ætla að hitta fulltrúa bæði United og Real Madrid á næstu dögum til að ræða mögulega sölu á Valencia. Þó mun eitt ónefnt félag til viðbótar hafa áhuga á honum.

Wigan vill fá átján milljónir punda fyrir Valencia en United er sagt tregt til að borga svo mikið.

„Ég tel að Antonio sé besti leikmaður heims í sinni stöðu og þá tel ég Franck Ribery með," sagði Whelan en Valencia leikur á hægri kantinum. „Ég held að stuðningsmenn United muni koma til með að dýrka hann eftir aðeins fáeina mánuði. Ég hef fylgst með honum í leikjum og á æfingum og hann er leikmaður í heimsklassa."

„Ég tel að þetta sé gjafverð fyrir Antonio. Það er útlit fyrir að United fái 80 milljónir punda fyrir Ronaldo og að þeir myndu aðeins nota lítinn hluta þeirrar upphæðar til að borga fyrir Antonio. Það eru góð viðskipti."