Þóra tekur fram skóna á ný

Sífellt færist í vöxt að konur taki sig saman og spili fótbolta. Hingað til hefur slíkt aðallega loðað við karlkynið en sjónvarpskonan Þóra Arnórsdóttir telur kvenkynið alveg eins eiga rétt á þessum „heilaga“ tíma.

Sjónvarpskonan Þóra Arnórsdóttir hefur tekið fram skóna á nýjan leik eftir töluverða fjarveru frá fótbolta. Hún æfir í Hlíðaskóla ásamt vöskum hópi kvenna undir nafninu FC Þú sparkar eins og stelpa. Hart er tekist á á æfingum enda eru sérstök verðlaun í boði á árshátíð félagsins fyrir flottustu áverkana.

Þóra segir konur eiga ekkert síður rétt á „heilögum“ tíma eins og karlarnir og bumbuboltinn þeirra. „Mennirnir geta farið á þessar æfingar hvernig sem ástandið er heima fyrir af því að þetta er „heilagur tími“. Konur geta alveg eins átt svoleiðis stundir,“ segir Þóra sem æfði frá unga aldri með Breiðabliki þar til hún tók handboltann fram yfir.

Sjónvarpskonan hefur engu síður haft brennandi áhuga á knattspyrnu og lék nokkra leiki með ungmennafélaginu Drangi og bjó einnig til lítið lið í Washington, þegar hún var þar við nám, sem var blandað körlum og konum. Þegar Þóra sneri heim var lítið um svona „utandeildarlið“ en Þóra telur árangur kvennalandsliðsins hafa kveikt í margri kvennakempunni.

„Þetta eru alveg þvílíkar fyrirmyndir. Ég fór með stjúpdætur mínar þrjár á heimildarmyndina og þær voru alveg agndofa.“ Enn er hins vegar ekki komin formleg utandeild í kvennaknattspyrnu eins og hefð hefur verið fyrir hjá körlum en sjónvarpskonan bindur vonir við að það geti orðið að veruleika í náinni framtíð.

„Það væri alveg frábært, að geta æft einu sinni í viku og svo spilað einn leik. Það er ekki mikið meiri tími sem maður hefur í þetta.“

freyrgigja@frettabladid.is