Bjargvætturinn í Grindavík

Þórarinn Brynjar Kristjánsson hefur samið við Grindavík til loka næstu leiktíðar og mun því spila með liðinu í efstu deild karla nú í sumar.

Þórarinn er uppalinn Keflvíkingur og hefur oft verið nefndur Bjargvætturinn. Samningur hans við Keflavík rann út í haust og hafa viðræður gengið illa.

„Það eru margar ástæður fyrir því að ég varð ekki áfram í Keflavík og er ég ekki tilbúinn að greina frá þeim öllum nú. En við höfum verið að tala saman um nýjan samning síðan um áramótin og þær viðræður hafa ekki gengið betur en þetta," sagði Þórarinn í samtali við Vísi.

Hann sagði að um tíma hafi komið til greina að fara til Noregs. „Það var komin vinna í gang með að finna mér lið þar. En þegar það kom til greina að fara til Grindavíkur ákvað ég að slá til. Við hittumst í hádeginu og gengum frá þessu nánast á staðnum. Þetta var mjög einfalt og þægilegt."

Þórarinn mun mæta á sínu fyrstu æfingu í kvöld og býst ekki við öðru að sér verði vel tekið, þó svo að hann sé Keflvíkingur. „Þetta er nú ekki í fyrsta sinn sem menn fara frá Keflavík til Grindavíkur eða öfugt," sagði hann.

„En mér líst vel á sumarið með Grindvaík. Mér sýnist liðið vera nokkuð sterkt. Ég á þó eftir að fara betur yfir markmið liðsins og get því kannski lítið spáð um þessa hluti nú."