Ástralski forsætisráðherrann sakaður um fjöldamorð

„Það er raðmorðingi í Ástralíu og við ætlum að sýna ykkur mynd af honum svo þið sjáið hver það er," sagði fréttaþulurinn Erin Burnett sem er þekktust fyrir að flytja yfirvegaðar fréttir af CNBC um verðbréfaviðskipti í heiminum.

henni ofbauð hinsvegar svo hrikalega áætlun ástralskra yfirvalda til þess að sporna við lausagöngu yfir milljón villtra kameldýra í Ástralíu að hún fór út af vananum þar sem hún þylur upp og útskýrir verðbréfamarkaðina og sýndi sjónvarpsáhorfendum mynd af forsætisráðherra Ástralíu, Kevin Rudd - og kallaði hann raðmorðingja.

Á vefsíðu Daily Telegraph er svo haft eftir henni: „Hann ætlar að hefja loftárásir - loftárásir - gegn kameldýrum í náttúrunni."

Burnett var algjörlega ofboðið en ekki jafn mikið og samstarfsmanni sínum Jim Cramer, sem er litríkur viðskiptagúrur á CNBC. Hann sagði Rudd stunda útrýmingar á kameldýrum eða „camelcide".

Kameldýr eru orðin plága í Ástralíu þar sem þau ganga hart á landið auk þess sem innfæddir hafa kvartað undan því að dýrin skemmi helgar lendur þeirra með ágengni sinni.

Engin viðbrögð eru kominn frá Kevin Rudd eða áströlsku ríkisstjórninni vegna málsins.