Man. Utd vann í vítaspyrnukeppni

Manchester United vann enska deildarbikarinn í dag með því að sigra Tottenham eftir vítaspyrnukeppni.

Ekkert var skorað í venjulegum leiktíma né framlengingu. Vísir lýsti leiknum beint og má lesa þá lýsingu hér að neðan.

Lið Man. Utd.: Ben Foster - John O´Shea, Rio Ferdinand, Jonny Evans, Patrice Evra - Cristiano Ronaldo, Paul Scholes, Darron Gibson, Nani - Carlos Tevez, Danny Welbeck.

Lið Tottenham: Heurelho Gomes - Vedran Corluka, Michael Dawson, Ledley King, Benoit Assou-Ekotto - Aaron Lennon, Jermaine Jenas, Didier Zokora, Luka Modric - Darren Bent, Roman Pavlyuchenko.

--------------------------------------------------------------------------------------------

4-1: Anderson skorar örugglega og tryggir Man. Utd titilinn.

3-1: Bentley skýtur framhjá.

3-1: Ronaldo öruggur.

2-1: Corluka skorar.

2-0: Tevez skorar.

1-0: Foster ver frá O´Hara.

1-0: Ryan Giggs tekur fyrsta vítið. Öruggt víti.

120. mín: Búið og vítaspyrnukeppni framundan.

119. mín: Patrice Evra með svakalegt skot rétt yfir markið.

116. mín: Darren Bent með fínt skot en Foster varði vel. Annars fátt um fína drætti og styttist í vítaspyrnukeppnina.

110. mín: Leikmenn orðnir afar þreyttir. United þó líklegri aðilinn en boltinn gengur hægt.

105. mín: Hálfleikur kominn í framlengingunni. Tevez átti skalla rétt fram hjá skömmu áður en blásið var til leikhlés. Þar á undan átti Bale góðan sprett en tapaði boltanum þegar hann hefði getað lagt hann á Bent sem var í opnu færi.

102. mín: David Bentley kemur inn fyrir Aaron Lennon sem meiddist. Áfall fyrir Spurs enda Lennon líklega verið besti maður vallarins.

99. mín: Gareth Bale kemur inn á fyrir Jermaine Jenas. Ekkert að gerast og léttur göngubolti í gangi.

95. mín: Framlengingin fer ákaflega hægt af stað.

91. mín: Ryan Giggs kemur af bekknum í upphafi framlengingarinnar. Darron Gibson yfirgefur svæðið.

90+2. mín: Ronaldo með skot í stöng 30 sekúndum fyrir leikslok. Spurs stálheppnir. Skömmu síðar flautað af og það er framlengt.

89. mín: Engin færi og stutt í framlengingu sem er líklega ekki vinsæll kostur hjá báðum liðum.

83. mín: Enn allt í járnum. Þessi leikur gæti farið í framlengingu.

77. mín: Nemanja Vidic kemur af bekknum í stað O´Shea sem haltrar af velli.

71. mín: Aaron Lennon í sannkölluðu dauðafæri en Ben Foster varði vel. Þarna slapp United fyrir horn.

67. mín: Ronaldo fær gult fyrir leikaraskap. Sjálfur vildi hann fá víti. Umdeilt atvik enda var klárlega snerting.

65. mín: Jamie O´Hara kemur af bekknum fyrir Pavlyuchenko sem virtist ekki par sáttur með að fara af velli.

61. mín: Tevez í ágætu færi en reynir að vera töff og skora með hælnum en það gengur ekki.

56. mín: Fyrsta skipting leiksins. Anderson kemur inn fyrir Welbeck sem fann sig ekki í leiknum.

55. mín: Stál í stál þessa stundina.

48. mín: Ronaldo komst í fínt færi en gaf boltann í stað þess að skjóta. Færið rann út í sandinn.

Hálfleikur: Markalaust í leikhléi. Engin opin færi litið dagsins ljós en United sterkari aðilinn í leiknum. Aaron Lennon hefur verið skæðasti leikmaður hálfleiksins og farið á köflum illa með Patrice Evra.

40. mín: Leikurinn rólegur og frekar jafn þessa stundina. United að gera sig seka um slæma sendingafeila. Nani búinn að vera sérstaklega slakur.

35. mín: Sóknarlotur Spurs eru nokkuð skæðar og það er helst Aaron Lennon sem skapar usla. Hann var að gefa fínan bolta á Pavlyuchenko en skalli hans var slakur.

31. mín: Greiðslan á Carlos Tevez vekur helst athygli þessa stundina. Það er engu líkara en hann hafi farið í sturtu rétt fyrir leik, sleppt því að þurrka sér og hent sér í búninginn. Darren Bent átti síðan fyrsta skot Spurs í leiknum eftir tæplega hálftíma leik.

28. mín: Leikurinn er rólegur í augnablikinu og fátt um fína drætti. United stýrir umferðinni algjörlega sem fyrr.

24. mín: Rio Ferdinand með magnað skot fyrir utan teig sem fór rétt yfir markið.

20. mín: Loksins má líf hjá Spurs sem var að ná sinni fyrstu alvöru sókn. Ben Foster í smá skógarhlaup og litlu munaði að Pavlyuchenko skoraði fyrir Spurs.

17. mín: Algjör einstefna að marki Spurs. Varnarmenn Spurs ekki alveg á tánum og gengur hreinlega illa að hreinsa boltann út úr teignum.

13. mín: Darron Gibson með frábært skot að marki utan teigs. Sveif rétt fram hjá marki Spurs. Markið virðist liggja í loftinu enda yfirburðir United miklir í upphafi leiks.

11. mín: Tottenham aðeins að ná áttum í leiknum. Vörnin skárri en fjarri því að ógna marki United á hinum vallarhelmingnum.

7. mín: Man. Utd byrjar leikinn mun betur og þjarmar að Tottenham. Ronaldo átti skot beint á Gomes og svo komst Welbeck í færi en var of seinn að athafna sig.

2. mín: Wayne Rooney er ekki í liði United eins og búist var við. Hann er ekki einu sinni í hópnum.