AGS krefst ekki að lífeyrissjóðirnir verði þjóðnýttir

Steingrímur J. Sigfússon, fjármálaráðherra, fullyrti á Alþingi í dag að Alþjóðagjaldeyrissjóðurinn hafi ekki gert kröfu um að lífeyrissjóðirnir verði þjóðnýttir.

Staða lífeyrissjóðanna var til umræðu að beiðni Vigdísar Hauksdóttur, þingmanns Framsóknarflokksins. Hún sagði í samtali við fréttastofu fyrr í dag vilja vita hvort að Alþjóðagjaldeyrissjóðurinn hafi gert kröfu að lífeyrissjóðirnir verði þjóðnýttir eins og „sjóðurinn gjarnan gerir þegar hann ræðst inn í lönd," líkt og þingmaðurinn orðaði það.

Steingrímur sagðist ekki vera kunnugt um slíkt og ekki hafa séð stafkrók um það í neinum plöggum. Ástæðulaust væri að hafa slíkar áhyggjur.