Jónas Ingi og Tindur fengu þunga dóma

Jónas Ingi Ragnarsson var dæmdur í tíu ára fangelsi og Tindur Jónsson í átta ára fangelsi í Héraðsdómi Reykjaness í morgun fyrir aðild sína að fíkniefnaverksmiðju sem var upprætt í Hafnarfirði í fyrra sumar.

Í dómi Héraðsdóms segir að mennirnir hafi staðið saman að framleiðslu mikils magns fíkniefna í söluskyni. Þá segir að ekki hafi verið ástæða til að gera greinarmun á þætti mannanna í málinu. Með því magni P-2-NP sem lögregla lagði hald á hefði mátt framleiða rúmlega 14 kg af hreinu amfetamíni.

Með því að drýgja efnið hefði samkvæmt útreikningum Europol mátt fá úr því allt að 353 kg af amfetamíni. Brot ákærðu eru talin stórfellt og eru talin enn alvarlegri en innflutningur eða varsla fíkniefna. Þá segir að ásetningur þeirra hafi verið mikill og einbeittur. Þeir eru síðan taldi ekki eiga sér neinar málsbætur.

Þeir Jónas og Tindur viðurkenndu báðir að hafa staðið að framleiðslu á efnunum P-2-P og P-2-NP sem notuð eru við framleiðslu á amfetamíni. Þeir sögðu þó báðir að ekki hafi staðið til að framleiða amfetamín úr efnunum og að ekki væri refsivert út af fyrir sig að framleiða þessi efni. Þá báru þeir brigður á að hægt væri að framleiða eins mikið magn amfetamín úr efnunum og haldið var fram í ákærunnni eða 353 kíló. Jónas Ingi viðurkenndi einnig að hafa haft amfetamín og kannabis í fórum sínum en sagðist ekki vera eigandi efnanna.

Tekinn með höndina í kökukrúsinni og á leið „austur“

Dómari lagði lítinn trúnað á framburð hinna ákærðu og vísaði meðal annars í vitnisburð lögreglumanna sem fluttu Jónas Inga á lögreglustöðina á Hverfisgötu eftir að hann var handtekinn. Þá hafi Jónas farið að fyrra bragði farið að tala um málið og sagt að hann hefði verið „tekinn með höndina í kökukrúsinni." Jónas Ingi bætti því við að hann væri á leiðinni „austur" í langan tíma og að það kæmi sér vel að hann þekkti samfélagið þar.

Jónas Ingi kom við sögu í einu umtalaðasta sakamáli síðari ára. Hann var einn þeirra sem hlaut fangelsisdóm í hinu svokallaða "Líkfundarmáli" á Neskaupsstað.

Fyrir aðild sína að málinu hlaut Jónas Ingi tveggja og hálfs árs fangelsisdóm fyrir innflutning á um 230 grömmum af amfetamíni sem Litháinn Vaidas Jucevicius var með innvortis þegar hann kom hingað til lands. Vaidas veiktist eftir komu sína til landsins og lést í kjölfarið vegna stíflu í mjógirni af völdum fíkniefnapakninganna.

Tindur Jónsson hlaut sex ára fangelsisdóm, 19 ára gamall, fyrir hrottalega líkamsárás í Garðabæ árið 2005 þegar hann réðist að öðrum pilti vopnaður sveðju.

Dóm héraðsdóms má lesa í heild sinni hér.