Verkefni Jónasar og Tinds notað í frumkvöðlakeppni

Efnafræðineminn Tindur Jónsson, annar þeirra sem ákærður er í amfetamínverksmiðjumálinu í Hafnarfirði, fór upphaflega að vinna fyrir hinn sakborninginn, Jónas Inga Ragnarsson, með það í huga að aðstoða hann við að framleiða eldvarnarefni. Honum þótti verkefnið svo vænlegt til árangurs að hann tók þátt í frumkvöðlakeppni hjá fyrirtækinu Innovit út á það. Þetta er meðal þess sem fram kemur í greinargerð verjanda Tinds, sem lögð var fram í Héraðsdómi Reykjaness í vikunni.

Í greinargerðinni segir enn fremur að Tindur hafi viljað ljúka afplánun dóms, sem hann hlaut fyrir sveðjuárás, á áfangaheimilinu Vernd. Til þess hefði hann þurft vinnu og engin önnur vinna hafi staðið til boða en sú hjá Jónasi Inga.

Mennirnir neita báðir að hafa ætlað að framleiða amfetamín í verksmiðju sem upprætt var í iðnaðarhverfi í Hafnarfirði í fyrrahaust. Sérfræðingur Europol hefur sagt að verksmiðjan hafi verið ein sú fullkomnasta sem hann hafi séð, og að úr upphafs- eða milliefnunum sem fundust á vettvangi hefði mátt framleiða um 353 kíló af amfetamíni.

Í greinargerðum verjendanna Sveins Andra Sveinssonar og Brynjars Níelssonar segir að hvorugur maðurinn hafi haft í hyggju að framleiða amfetamín. Jónas Ingi hafi vitað að það væri hægt, en Tindur ekki haft hugmynd um það. Auk þess hafi hvergi fundist önnur nauðsynleg efni til amfetamínframleiðslu.

Segir í greinargerð Sveins að Jónas Ingi hafi ætlað að framleiða milliefnið P-2-P úr upphafsefninu P-2-NP með aðstoð Tinds.

Hann hafi síðan ætlað að selja milliefnið á svörtum markaði. Framleiðsla þess sé ekki ólögmæt nema ef sannað þykir að það hafi verið ætlað til fíkniefnaframleiðslu, en það hafi Jónas ekkert vitað um.

Hátt í tonn af mjólkursykri sem fannst á staðnum, og lögregla telur að hafi verið ætluð sem íblöndunarefni til drýgingar amfetamínsins, breyti engu þar um enda hafi Jónas stundað sölu á ýmsum efnum sem hefði mátt drýgja fíkniefni með.

Þá er gerð athugasemd við ætlað magn amfetamíns sem segir í ákæru að hefði mátt framleiða úr upphafs- og milliefnunum.

Kílóin 353 séu miðuð við vel drýgt og veikt amfetamín en réttilega ætti að miða við hreint amfetamín, og líklega hefði einungis mátt framleiða fjórtán slík kíló úr efnunum miðað við 50 prósenta afrakstur.

Aðalmeðferð í málinu fer fram í byrjun september.