Jackson: Við gefumst aldrei upp

Michael Jackson var hetja Þróttara í kvöld er hann tryggði sínum mönnum 3-2 sigur á Fylki með marki á lokamínútu leiksins.

Fylkismenn komust tvívegis yfir í leiknum en Þróttarar jöfnuðu í síðara skiptið átta mínútum fyrir leikslok og skoruðu svo sigurmarkið með nánast síðustu snertingu leiksins.

Jackson var þar að verki með skalla eftir hornspyrnu en hann sagði í samtali við Vísi eftir leik að vissulega væri gaman að skora svo þýðingarmikið mark.

„Það er alltaf gaman að skora og þá sérstaklega svona seint í leiknum. Það er mjög ljúft," sagði Jackson. „Þetta var samt erfiður leikur og ég hélt eftir að þeir komust yfir í seinni hálfleik að við værum að missa leikinn úr höndunum. En svo jöfnuðum við og það gaf okkur meiri kraft. Okkur fannst við eiga að vinna leikinn sem og við gerðum."

„Einkenni okkar er að við gefumst aldrei upp og berjumst allt til leiksloka. Það borgaði sig í dag."

Þróttur hefur nú unnið tvo leiki í röð og eru komin með sjö stig í deildinni eftir fremur erfiða byrjun.

„Við áttum slæman leik í fyrstu umferðinni en höfum verið að bæta okkur í hverjum leik síðan þá. Við reynum fyrst og fremst að standa saman og berjast og það hefur sem betur fer skilað sér í stigum undanfarið."