Tryggðu sér sigur með síðustu snertingu leiksins

Þróttarar fögnuðu í kvöld dýrmætum 3-2 sigri á Fylki í Árbænum í kvöld eftir að hafa lent tvívegis undir og skorað sigurmark leiksins með síðustu snertingu leiksins, ef frá er talin miðjan sem Fylkismenn tóku eftir markið.

Fylkir komust tvívegis yfir í leiknum með mörkum Þóris Hannessonar og Jóhannes Þórhallssonar. En Þróttarar, sem voru afar sprækir lengst af í leiknum, neituðu að játa sig sigraða. Magnús Már Lúðvíksson jafnaði metin í fyrri hálfleik og Hjörtur Hjartarson úr víti í síðari hálfleik. Það var svo varnarmaðurinn Michael Jackson sem tryggði Þrótti sigur í blálokin.

Þórir skoraði fyrsta mark Fylkis eftir laglega stungusendingu Vals Fannars Gíslasonar á sextándu mínútu.

Skömmu síðar kom Magnús Már inn á sem varamaður fyrir Adolf Sveinsson sem á við meiðsli að stríða. Hann skoraði svo jöfnunarmarkið á 38. mínútu með skoti úr vítateignum.

Þróttarar voru talsvert öflugri í fyrri hálfleik og áttu tvö skot í stöng. Í síðara skiptið átti Magnús Már laglegt þríhyrningsspil við Hjört Hjartarson og var Magnús óheppinn að boltinn fór ekki inn.

Síðari hálfleikur fór rólega af stað en það voru heimamenn sem voru fyrri til að skora síðari hálfleik. Aftur kom Þórir við sögu en hann skallaði í stöng eftir hornspyrnu. Þaðan barst boltinn beint fyrir fætur Jóhanns Þórhallsonar sem skoraði af miklu öryggi.

Stuttu síðar fengu Fylkismenn tækifæri til að auka muninn enn frekar er Jóhann var kominn einn gegn markverði Þróttar eftir sendingu Allans Dyring. Bjarki Freyr Guðmundsson varði hins vegar slakt skot Jóhanns.

Bæði lið gerðu sig líkleg til að skora eftir þetta og var til að mynda bjargað á línu báðum megin á vellinum. 

Síðara jöfnunarmark Þróttar kom svo úr víti þegar átta mínútur voru til leiksloka. Valur Fannar Gíslason gerði sig sekan um að brjóta á Hirti Hjartarsyni sem skoraði sjálfur úr spyrnunni af miklu öryggi.

Þróttarar gerðu sig frekar líklegri til að skora sigurmarkið og uppskáru það í blálok leiksins er Michael Jackson skoraði með skalla. Fyrir vikið er Þróttur komið upp í sjöunda sæti deildarinnar með átta stig en Fylkir er enn í fimmta sæti með níu stig.