Ronaldo í Corinthians

Brasilíski sóknarmaðurinn Ronaldo hefur komist að samkomulagi við lið Corinthians í heimalandi sínu.

Corinthians er í Sao Paulo og er eitt af stærstu félögum Brasilíu en liðið vann sér inn sæti í efstu deild á dögunum eftir eins árs fjarveru.

Ronaldo er 32 ára en hann sleit liðbönd í hné í leik með AC Milan í febrúar og var síðan leystur undan samningi við ítalska félagið. Hann fór í aðgerð og hefur verið í endurhæfingu í Brasilíu síðustu mánuði.

Hann er ekki í sínu besta formi og viðurkenndi það að eiga við fataskort að stríða vegna þeirra aukakílóa sem hann bætti á sig í meiðslunum.

Ronaldo hefur ekki leikið með brasilísku liði síðan hann yfirgaf Cruzeiro sautján ára gamall og gekk til liðs við PSV Eindhoven í Hollandi.