Enn stendur á launagreiðslum hjá Hearts

Skoska úrvalsdeildarfélagið Hearts hefur ekki greitt leikmönnum sínum laun eftir því sem breskir fjölmiðlar hafa greint frá síðustu daga.

Þetta er í annað skiptið á tímabilinu sem þetta gerist. Í fyrra skiptið var kerfisvillu kennt um en í dag fullyrti talsmaður fjárfestingarfélagsins sem sér um fjármál Hearts að launin væru væntanleg í dag.

„Launagreiðslurnar fóru inn í kerfið á föstudaginn og ættu að koma inn á bankareikninga leikmanna í dag," sagði talsmaðurinn. Enn fremur sagðist hún engar skýringar hafa um ástæður tafarinnar.

Umrætt fjárfestingarfélag er í eigu Vladimir Romanov.

Eggert Gunnþór Jónsson er á mála hjá Hearts en hann sagði í samtali við Vísi að honum væri ekki heimilt að ræða þessi mál við fjölmiðla.