Fjölnir lagði Fylki

Einn leikur fór fram í Landsbankadeild karla í knattspyrnu í kvöld. Fjölnismenn unnu 1-0 sigur á grönnum sínum í Fylki í Grafarvogi. Það var Tómas Leifsson sem skoraði markið sem réði úrslitum á 40. mínútu leiksins.

Gestirnir úr Árbænum voru beittari í fyrri hálfleiknum en Fjölnismenn skoruðu þá það sem reyndist sigurmark leiksins úr eina markskoti sínu í hálfleiknum.

Heimamenn voru hressari í síðari hálfleik og átti Ólafur Páll Snorrason t.d. skot í slá úr aukaspyrnu, en Andri Baldvinsson, varamaður Fylkis, átti sömuleiðis skalla í slá Fjölnismarksins í uppbótartíma.

Leifur Garðarsson þjálfari Fylkis fékk að líta rauða spjaldið þegar hann fékk sitt annað gula spjald. Hann var mjög ósáttur við dómgæsluna í leiknum og það er ekki í fyrsta sinn í sumar sem hann lætur óánægju sína í ljós í þeim efnum.

Fjölnismenn unnu fyrstu þrjá leiki sína í deildinni en höfðu síðan tapað þremur í röð. Nýliðarnir hafa því hlotið 12 stig í deildinni eftir sjö leiki og sitja í þriðja sæti deildarinnar. Fylkir er með níu stig og situr í sjötta sætinu.

Nánari umfjöllun um leikinn kemur hér á Vísi snemma í fyrramálið.