Chelsea lögsækir Lyn vegna John Obi Mikel

Enska úrvalsdeildarfélagið Chelsea hefur ákveðið að lögsækja norska úrvalsdeildarfélagið Lyn og krefjast að félagið fái aftur þær sextán milljónir punda sem það greiddi fyrir John Obi Mikel á sínum tíma.

Félagaskipti hans í júní árið 2006 komust í heimsfréttirnar þar sem að Lyn virtist hafa samið við Manchester United um félagaskipti þeirra á milli. Leikmaðurinn sjálfur vildi hins vegar fara til Chelsea sem varð svo raunin.

Að lokum var samið um greiðslur á milli félaganna þriggja og um leið samþykktu þau að grípa ekki til frekara aðgerða í framtíðinni. Manchester United fékk tólf milljónir punda og Lyn fjórar.

Síðan þá hefur Morgan Andersen, þáverandi yfirmaður knattspyrnumála hjá Lyn, verið sakfelldur í heimalandi sínu fyrir að falsa atvinnumannasamning Obi Mikel við Lyn.

Það er vegna þess sem Chelsea hefur ákveðið að lögsækja Lyn. „Chelsea hefur skrifað Lyn til að gera þeim skýrt að í ljósi þess að félagið og Morgan Andersen komu fram á fölskum forsendum, eins og nú hefur verið sannað fyrir rétti, að áðurnefnt samkomulag eigi ekki lengur við," sagði í yfirlýsingu á heimasíðu Chelsea.

Þar kemur einnig fram að forráðamenn félaganna hafa fundað um málið og að Chelsea hlakki til að vinna með Lyn á jákvæðum nótum til að leysa þetta mál.

Þar er einnig tekið skýrt fram að lögsókn Chelsea beinist eingöngu gegn Lyn og Morgan Andersen.