Koller til Rússlands

Tékkneski risinn Jan Koller skrifaði í gær undir samning við liðið Krylya Sovetov Samara í Rússlandi. Eftir að Tékkar féllu úr leik á Evrópumótinu lagði Koller landsliðsskóna á hilluna eftir 90 landsleiki og 55 mörk.

Koller er 35 ára og er 2,02 metrar á hæð. Hann hóf sinn fótboltaferil sem markvörður en var síðan settur í sóknina. Hann hefur leikið með Sparta Prag, Lokeren, Anderlecht, Borussia Dortmund, Monaco og síðast Nürnberg.

Koller féll með Nürnberg úr þýsku úrvalsdeildinni á síðasta tímabili.