Hverfisslagur í austurhluta Reykjavíkur

Einn leikur er í Landsbankadeild karla er Fjölnismenn taka á móti Fylki. „East Reykjavík Derby," segir Leifur Garðarsson, þjálfari Fylkis.

„Þetta verður frábært enda Fjölnir með skemmtilegt og tilhlökkun að mæta þeim í Grafarvoginum," bætti Leifur við.

Bæði lið töpuðu síðasta leik og vilja því koma sér aftur á beinu brautina með sigri í kvöld. Fylkismenn töpuðu fyrir Þrótturum á heimavelli í síðustu umferð, 3-2, eftir þrjá sigurleiki í röð.

„Þetta var fyrst og fremst einbeitingarleysi af okkar hálfu," sagði Leifur. „Við vorum ekki merkilegir í fyrri hálfleik en komum okkur í ágæta stöðu í þeim síðari. En þá köstuðum við þessu frá okkur."

Kristján Valdimarsson verður í banni í leiknum í kvöld en Leifur óttast ekki að hann sé að verða uppiskroppa með varnarmenn. „Nei, alls ekki. Það eru nokkrir leikmenn sem geta leyst stöðuna hans. Og þar að auki eru ellefu varnarmenn inn á vellinum."

„En Fjölnismenn eru hættulegir þó svo að þeir hafi tapað þremur í röð. Ég sá þá á móti FH og þeir hefðu vel getað komið sér inn í þann leik en það féll ekki með þeim þá. Þeir eiga marga hættulega leikmenn sem geta breytt gangi leiksins."

Ásmundur Arnarsson, þjálfari Fjölnis, óttast ekki að það sé komin lægð í Grafarvoginn eftir tapleikina þrjá. „Við erum spenntir fyrir leiknum í kvöld og þó svo að við myndum tapa óttast ég ekki að leikmenn missi sjálfstraustið. Við höfum lítið verið að hugsa um einhverja taphrinu og tökum einn leik fyrir í einu. En auðvitað vonast ég til að við komum okkur á rétta braut í kvöld."

Fjölnir er nú á sínu fyrsta tímabili í efstu deild og hafa þessi lið aldrei mæst áður á þeim vettvangi. Þetta eru grannlið og svipuð í augum margra.

„Þeir sem lítið þekkja til spyrja oft hvort ég sé ekki að þjálfa Fylki," sagði Ásmundur og hló. „En þetta er athyglisverður leikur fyrir margra hluta sakir."