Guðný Björk til Kristianstad

Guðný Björk Óðinsdóttir hefur gengið til liðs við sænska úrvalsdeildarfélagið Kristianstad en Elísabet Gunnarsdóttir, þjálfari liðsins, staðfesti þetta í samtali við Vísi.

Guðný gerði eins árs samning við Kristianstad en hún er nú óðum að jafna sig á meiðslum sem hún varð fyrir í vor. Fyrir vikið gat hún ekkert spilað með Val í sumar en hún kom til félagsins frá Aftureldingu árið 2005.

„Þegar hún kom fyrst til Vals var hún einnig að jafna sig á samskonar meiðslum og nú. Þá vann ég með henni í gegnum það og hjálpaði henni," sagði Elísabet sem þjálfaði Val þar til nú í haust.

„Félagið er meðvitað um meiðslin hennar en ég hef engar áhyggjur af þeim."

Elísabet segir að Guðný sé afar fjölhæfur leikmaður og því mikill fengur fyrir Kristianstad. „Ég hef gríðarlega mikið álit á henni. Þetta er einn hæfileikaríkasti leikmaður Íslands og hún spilar ávallt með hjartanu. Hún er þeim eiginleikum gædd að hún er fjölhæf og getur spilað margar stöður."

Elísabet á nú einnig í viðræðum við Hólmfríði Magnúsdóttur, leikmann KR, um að fylgja henni til Svíþjóðar. „Vonandi mun það ganga eftir en annars hef ég ekki átt í frekari viðræðum við leikmenn hér á landi."