Butcher ekki búinn að fyrirgefa Maradona

Terry Butcher, núverandi aðstoðarþjálfari skoska landsliðsins, segir að hann muni aldrei fyrirgefa Diego Maradona markið fræga sem kennt er við hönd guðs. Markið varð til þess að England féll úr leik á HM fyrir 22 árum.

„Nei ég mun aldrei fyrirgefa honum. En þessi blaðamannafundur snýst ekki um mig, hann snýst um Skotland og leik gegn einu besta liði heims," sagði Butcher á blaðamannafundi í dag en Skotland leikur vináttulandsleik gegn Argentínu á morgun.

Butcher var einn af leikmönnunum sem Maradona lék svo glæsilega á þegar hann skoraði eitt glæsilegasta mark allra tíma. Fyrir það mark hafði Maradona notað hendi sína til að slá boltann framhjá Peter Shilton í marki Englands án þess að dómarinn tók eftir því. Maradona er nú þjálfari argentínska landsliðsins eins og flestir vita.

„Það er mjög erfitt að gleyma þessum leik en það eru 22 ár síðan og þessu verður ekki breytt," sagði Butcher sem vildi þó aðallega ræða komandi landsleik. „Það er alltaf frábært að leika gegn Argentínu. Ég varð þess heiðurs aðnjótandi að fá að spila nokkra stórleiki gegn þeim og þeir hverfa mér seint úr minni."