Noregur, Skotland og Makedónía töpuðu í gær

Ísland og Holland voru einu liðin í 9. riðli undankeppni HM 2010 sem unnu sína vináttulandsleiki í gær. Noregur, Skotland og Makedónía töpuðu öll sínum leikjum.

Ísland vann 1-0 sigur á Möltu með marki Heiðars Helgusonar og þá unnu Hollendingar góðan 3-1 sigur á Svíum á Amsterdam Arena. Robin van Persie skoraði tvö marka Hollands og Dirk Kuyt eitt. Kim Källstrom skoraði eina mark Svía í leiknum.

Maxi Rodriguez tryggði Argentínu 1-0 sigur á Skotum á Hampden og Norðmenn töpuðu fyrir Úkraínu með sama mun í Dnipropetrovsk. Jevjen Seleznov skoraði eina mark leiksins úr víti en John Arne Riise fékk að líta rauða spjaldið í leiknum.

Makedónía byrjaði mjög vel í undankeppni HM 2010 í haust og vann 1-0 sigur á Skotum. Liðið tapaði svo fyrir Íslandi en í gær mátti liðið sætta sig aftur við tap, í þetta sinn fyrir Svartfjallalandi, 2-1. Goran Pandev skoraði eina mark Makedóníu í leiknum.

Næstu leikir í riðlinum fara fram í mars og apríl á næsta ári. Næsti leikur Ísland verður gegn Skotum ytra þann 1. apríl. Næsti heimaleikur Íslands verður gegn Hollandi þann 6. júní.