Sólskinstundir um þriðungi fleiri í apríl en í meðalári

Ríflega 200 sólskinsstundir mældust í Reykjavík í nýliðnum aprílmánuði og er það rúmlega 67 klukkustundum umfram meðallag. Þetta er mun meira sólskin en mældist í apríl í fyrra en svipað og árið 2006. Á Akureyri reyndust sólskinsstundirnar 151 og er það 21 stund yfir meðallagi.

Hins vegar reyndist snjór á láglendi ívið meiri en undanfarin ár fram eftir aprílmánuði. Þann 9. apríl var 11 sentímetra snjódýpt í Reykjavík og þann 14. var 15 sentímetra snjódýpt á Höfn í Hornafirði.

Hæsti hiti í mánuðinum á mannaðri stöð mældist á Bláfeldi þann 24. apríl, 14 stig, en á sjálfvirkri stöð á Neskaupstað í Drangagili þann 18. apríl mældist hitinn 20 stig. Kaldast í mánuðinum á mannaðri stöð varð á Grímsstöðum á Fjöllum aðfaranótt 14. apríl, -15,4 stig, en á sjálfvirkri stöð á Setri þann 15., -21,3 stig.