Ólafur: Hef engar áhyggjur

Ólafur Stígsson, fyrirliði Fylkis, hefur engar áhyggjur af sínum mönnum þó svo að liðið hafi tapað síðustu tveimur leikjum sínum, nú síðast fyrir Fjölni á útivelli.

„Mér fannst við miklu betri í fyrri hálfleik og áttum að klára leikinn þá," sagði Ólafur í samtali við Vísi. „Þetta var líka lélegt mark sem við fengum á okkur og við hefðum átt að mæta manninum betur áður en hann náði skotinu."

„En í seinni hálfleik vorum við hreinlega daprir. Við vorum ekki nægilega skynsamir í sóknaraðgerðum okkar og vorum að snerta boltann of mikið. Ég er því ánægður með fyrri hálfleikinn en mjög ósáttur við tapið."

Hann hefur þó engar áhyggjur sem fyrr segir. „Við þurfum bara að koma núna sterkir til baka. Við töpuðum fyrstu tveimur leikjum okkar á mótinu og unnum svo þrjá í röð. Við verðum bara að gera það aftur núna."