Hannes vill rannsókn á Baugsmálinu

Hannes Hólmsteinn Gissurarson vill að aðdragandi Baugsmálsins verður rannsakaður. Þetta kom fram í spjallþætti á Útvarpi Sögu í gær.

,,Málið er eins einfalt og hægt er og ég ætla að segja eitt um þetta. Það er. Ég myndi sjálfur gjarnan vilja að það færi fram rannsókn á upphafi og upptökum Baugsmálsins eins og sumir eru að heimta. Það væri bara mjög gott að leiða allan sannleikann í ljós um þetta því ég held að Davíð Oddsson þurfi bara nákvæmlega ekkert að óttast neitt um þetta," sagði Hannes.

Áður hafa Steingrímur J. Sigfússon, formaður Vinstri grænna, og Lúðvík Bergvinsson, þingflokksformaður Samfylkingarinnar, sagt að þeir telji eðlilegt að Baugsmálið verði rannsakað. Valtýr Sigurðsson, ríkissaksóknari, hefur sagt að embætti sitt muni ekki rannsaka aðdraganda málsins og hvernig farið var með lögreglu- og ákværuvald í málinu. Alþingi getur sett sérstök lög eða skipað rannsóknarnefnd til að fara yfir málið.