Willum: Sigur í kvöld er miði fyrir okkur inn í mótið

Það verður sannkallaður stórleikur í Landsbankadeild karla í kvöld þegar Valur tekur á móti FH. Leikurinn hefst klukkan 20:00 en með sigri geta FH-ingar komist í efsta sæti.

Íslandsmeistarar Vals hafa ollið vonbrigðum það sem af er móti og ansi mikilvægt fyrir þá að vinna í kvöld. „Það má orða það þannig að þessi leikur sé miði fyrir okkur inn í mótið eins og staðan er núna," sagði Willum Þór Þórsson, þjálfari Vals, í viðtali í útvarpsþættinum Skjálfanda á X-inu.

„Við höfum að undanförnu lagt áherslu á varnarleikinn þar sem við vorum að fá mikið af mörkum á okkur í upphafi móts. Við þurftum að laga til í okkar leik og það hefur tekist ágætlega. Við höfum ekki verið eins sókndjarfir og venjulega en náð upp betri jafnvægi í okkar leik," sagði Willum.

Valsmenn litu feykilega vel út á undirbúningstímabilinu en lentu svo í meiðslavandræðum. „Við höfum ekkert efni á að vera að svekkja okkur eitthvað. Við lögðum mikla áherslu á að vinna þessi mót á undirbúningstímabilinu. Liðið sem var að virka þá átti að fara inn í mótið en við urðum fyrir skakkaföllum í meira lagi. Óvenju mikið af kjarnaleikmönnum duttu út."

„Guðmundur Benediktsson hefur verið okkar leikstjórnandi sóknarlega og Barry Smith varnarlega. Þessir tveir höfðingjar hafa ekki verið með og það auðvitað tekur tíma að fá aðra í það hlutverk. Við eigum aðra leikmenn sem geta tekið því hlutverki en það tekur alltaf tíma," sagði Willum.

Valsarar unnu báða leikina gegn FH í fyrra. „Þetta eru lið sem gjörþekkja hvort annað. Þetta verður hörkuviðureign. FH-liðið er auðvitað eitt öflugasta liðið á landinu, ef ekki það öflugasta. Það eru fá lið sem eru jafn vel spilandi," sagði Willum.

Hann segir að Valur muni enn eiga möguleika á titlinum þó liðið muni ekki ná sigri í kvöld. „Fótbolti er sagan endalausa. Hinsvegar myndi viðfangsefnið fara að líta öðruvísi út. Við verðum að takast á við stöðuna eins og hún er hverju sinni. Við munum ekki sætta okkur við jafntefli í kvöld, það er ljóst," sagði Willum í útvarpsþættinum Skjálfanda á X-inu.

Leikurinn í kvöld verður í beinni útsendingu á Stöð 2 Sport og þá verður að sjálfsögðu fylgst með gangi mála á Boltavakt Vísis og Fréttablaðsins.