Telur frekari málaferli hjá Eimskip líkleg

Vilhjálmur Bjarnason, viðskiptafræðingur og formaður Félags fjárfesta, telur frekari málaferli vera yfirvofandi í tengslum við Eimskipafélagið og Baldur Guðnason, fyrrverandi forstjóra fyrirtækisins.

Baldur hefur stefnt Eimskip fyrir að virða ekki starfslokasamning við hann. Fyrirtækið stöðvaði allar greiðslur til Baldurs í maí skömmu eftir að hann lét af störfum.

,,Það er eitthvað meira í pípunum. Hingað til hafa menn ekki hikað við að standa við starfslokasamninga. Þvert á móti," segir Vilhjálmur.

Baldur segir Eimskip skulda sér laun í 22 mánuði eða 140 milljónir. Það gera rúmlega 6,4 milljón á mánuði í næstum því tvö ár frá starfslokum. Vilhjálmur segir starfslokasamninga eins og Baldurs vera út í bláinn. ,,Auk þess er augljót að hann var ekki að vinna vinnuna sína," segir Vilhjálmur að lokum og vísar til erfiðleika fyrirtækisins undanfarin misseri.