Tíu stærstu floppin á EM

Evrópumótið í knattspyrnu lýkur á sunnudaginn kemur með úrslitaleik Spánverja og Þjóðverja. Mótið hefur verið frábær skemmtun en böggull fylgir hverju skammrifi.

Það er breska götublaðið The Sun sem tók saman listann og birti á heimasíðu sinni.

10. sæti: Afsakið hlé

Þrumur og eldingar gengu yfir Vínarborg á meðan undanúrslitaleik Þýskalands og Tyrklands stóð á fimmtudagskvöldið og gerði það að verkum að útsending rofnaði í að minnsta kosti tíu mínútur. Íslendingar misstu af tveimur mörkum í leiknum sem Þjóðverjar unnu, 3-2.

9. sæti: Karim Benzema

Benzema hefur verið heitasta ungmennið í evrópska boltanum undanfarna árið og átti að slá í gegn með franska landsliðinu á EM. En Frakkar féllu úr leik í riðlakeppninni og Benzema náði sér alls ekki á strik í þeim tveimur leikjum sem hann lék með Frökkum.

8. sæti: Adrian Mutu

Aðeins ein spyrna getur skilið á milli hetju og skúrks og slíkt var tilfellið hjá Rúmenanum Adrian Mutu. Hann hefði getað komið sínum mönnum áfram með því að skora úr vítaspyrnu sem Rúmenía fékk undir lok leiksins en Mutu misnotaði vítið. Rúmenar töpuðu svo fyrir Hollendingum í lokaleik sínum í keppninni og féllu úr leik.

7. sæti: Gestgjafarnir

Sem gestgjafar var liðum Austurríkis og Sviss raðað í efsta styrkleikaflokkinn þegar dregið var í riðla. Þetta voru þó tvö af lélegustu liðunum í keppninni og féllu bæði strax úr leik. Austurríki gerði jafntefli við Pólverja, sem einnig féllu úr leik og Sviss vann sigur á Portúgal eftir að síðarnefnda þjóðin var búin að tryggja sér sæti í fjórðungsúrslitunum.

6. sæti: Mario Gomez

Gomez átti frábæru gengi að fagna í þýsku úrvalsdeildinni í vetur og margir bjuggust við því að hann myndi slá í gegn á EM. Joachim Löw, landsliðsþjálfari Þjóðverja, var einn þeirra og var með hann í byrjunarliðinu í riðlakeppninni. Hann klúðraði nokkrum dauðafærum og mátti sætta sig við varamannabekkinn er Löw breytti leikkerfi þýska landsliðsins úr 4-4-2 í 4-5-1.

5. sæti: Thierry Henry

Henry olli vonbrigðum með Barcelona og ekki tókst honum að bjarga tímabilinu á EM í Austurríki og Sviss. Hann skoraði gegn Hollandi en náði sér engan vegin á strik í mótinu, frekar en flestir aðrir leikmenn franska landsliðsins. Sá eini sem stóð undir væntingum var Franck Ribery sem sást best á því að eftir að hann meiddist datt endanlega botninn úr leik liðsins.

4. sæti: Grikkland

Það kom öllum á óvart þegar Grikkir urðu Evrópumeistarar fyrir fjórum árum. Það kom engum á óvart er liðið tapaði öllum sínum leikjum á mótinu í ár. Otto Rehhagel gerði liðið að meisturum síðast en gjörsamlega tapaði sér á hliðarlínunni í ár. Leikir gríska liðsins voru einstaklega leiðinlegir og sjálfsagt hefur ekkert lið í sögu mótsins boðið upp á jafn getulausan sóknarleik.

3. sæti: Eric Abidal

Rétt eins og Henry átti hann afar erfitt uppdráttar með Barcelona í vetur og bað meira að segja Rijkaard um að taka sig úr liðinu, svo lélegur væri hann. Hann hélt þó sæti sínu í byrjunarliði Frakka og þakkaði fyrir sig með því að klippa niður Luca Toni í vítateignum í leiknum gegn Ítalíu. Víti var dæmt, Abidal fékk rauða spjaldið og Frakkar féllu úr leik.

2. sæti: Petr Cech

Tékkar komust í 2-1 forystu gegn Tyrklandi í hreinum úrslitaleik um hvor þjóðin kæmist í fjórðungsúrslitin. Þá kom fyrirgjöfin þar sem Cech átti að grípa boltann eða kýla hann langt út úr teignum. En í staðinn missti hann boltann á versta stað og Tyrkir jöfnuðu og skoruðu svo sigurmarkið í uppbótartímanum.

1. sæti: Luca Toni

Hann skoraði 31 mark með Bayern München í þýsku úrvalsdeildinni og átti að vera lykilmaður í heimsmeistaraliði Ítalíu. Toni var skelfilegur á mótinu og klúðraði mýgrút góðra færa. Á endanum féllu Ítalir úr leik í fjórðungsúrslitunum og Roberto Donadoni var rekinn úr starfi landsliðsþjálfara.