Barist gegn tillögu Blatter

Voldugustu fótboltafélög Evrópu eru mótfallin tillögu Sepp Blatter um takmörkun á fjölda erlendra leikmanna í liðum og ætla að berjast gegn henni.

Tillagan gengur út á að ekki fleiri en fimm erlendir leikmenn verði í byrjunarliði félaga og vill Blatter að reglan taki gildi árið 2012. Blatter benti á ensku úrvalsdeildina sem dæmi um þar sem þessi regla væri nauðsynleg.

„Eins og Kevin Keegan benti á getur hann aðeins stefnt á að ná fimmta, sjötta eða sjöunda sæti deildarinnar. Það væri ómögulegt fyrir hann að blanda sér í hóp efstu fjögurra liðanna," sagði Blatter.

Hin nýstofnuðu ECA-samtök ætla að berjast gegn þessum hugmyndum. Í samtökunum eru 103 félagslið í 53 löndum.