Býst við að Þýskaland vinni EM

Velgengni þýska landsliðsins á Evrópumótinu kemur Ottmar Hitzfeld ekkert á óvart. Hitzfeld stýrði Bayern München til deildar- og bikarmeistaratitils í Þýskalandi á síðasta tímabili.

„Ég reiknaði með að þeir færu í undanúrslit og hef alltaf sagt að þeir ættu möguleika á því að verða Evrópumeistarar," sagðu Hitzfeld sem tekur við þjálfun landsliðs Sviss í næsta mánuði.

„Þýskaland tók þriðja sætið á HM fyrir tveimur árum með ungt lið sem orðið er reynslunni ríkara í dag. Philipp Lahm, Bastian Schweinsteiger og Lukas Podolski hafa allir bætt sig og Michael Ballack er orðinn frábær leiðtogi. Ég held að þeir verði meistarar."

Þýskaland mætir Tyrklandi í undanúrslitum Evrópumótsins klukkan 18:45 í kvöld.