Nær Valur fram hefndum í kvöld?

Tveir leikir eru í Landsbankadeild karla í kvöld en báðir hefjast þeir klukkan 19:15. Valsmenn fá Fylki í heimsókn og Fjölnir tekur á móti Grindavík.

Með sigri í kvöld getur Valur nálgast toppliðin tvö, verður þá fjórum stigum á eftir Keflavík. Valsmenn eiga harma að hefna frá því í fyrri leiknum gegn Fylki í sumar þar sem Árbæingar unnu 2-0 sigur.

Ef Fylkismenn ná að endurtaka leikinn og leggja Val aftur geta þeir farið að anda ansi rólega þar sem þeir komast þá níu stigum frá fallsæti.

Fjölnismenn hafa aðeins verið að lækka flugið og tapað síðustu tveimur leikjum en með sigri í kvöld stökkva þeir úr sjöunda sæti upp í það þriðja. Grindavík er fjórum stigum á eftir Grafarvogsliðinu.