Ný lög frá Franz Ferdinand og Peter, Björn & John

Íslandsvinirnir ógurlegu í hljómsveitinni Franz Ferdinand hafa lætt nýju lagi á heimasíðu sína. Lagið nefnist Lucid Dreams og var það sérstaklega samið til þess að prýða tölvuleikinn Madden NFL 09. Þó er talið líklegt að lagið verði einnig að finna á þriðju breiðskífu sveitarinnar sem er væntanlega á næstu mánuðum.

Aðrir Íslandsvinir með meiru, Svíarnir knáu Peter, Björn & John, eru einnig búnir að koma nýju lagi á veraldarvefinn. Lagið kallast Inland Empire og er það hið fyrsta sem heyrist af væntanlegri plötu, Seaside Rock. Platan verður eingöngu gefin út á vínyl-formi en með vínylnum fylgir þó kóði til þess að niðurhala plötunni af netinu.

Lagið er nokkuð frábrugðið því sem áður hefur heyrst frá tríóinu enda verður öll næsta plata án söngs, hvorki meira né minna.

Hlustaðu á nýja lagið með Franz Ferdinand hér.

Hlustaðu á nýja lagið með Peter, Björn & John hér.