Ísland náði jafntefli á Írlandi

Ísland gerði í dag 1-1 jafntefli við Írland í fyrri leik liðanna um laust sæti á EM í Finnlandi á næsta ári.

Hólmfríður Magnúsdóttir kom Íslandi yfir strax á fyrstu mínútu leiksins en Írar jöfnuðu metin í síðari hálfleik. Þetta eru góð úrslit fyrir Ísland en liðin mætast aftur á Laugardalsvelli á fimmtudaginn. Sigur eða markalaust jafntefli dugir til að tryggja íslenska liðinu farseðilinn til Finnlands. 

Tvær breytingar voru gerðar á byrjunarliði Íslands fyrir leikinn frá síðasta landsleik, er Ísland tapaði 2-1 fyrir Frakklandi ytra. Þóra Helgadóttir markvörður er meidd og í hennar stað stóð María B. Ágústsdóttir í markinu. Þá tók Dóra Stefánsdóttir út leikbann í dag og Rakel Hönnudóttir kom inn í liðið.

Íslenska liðið byrjaði gríðarlega vel í leiknum og skoraði strax úr sinni fyrstu sókn. Írar byrjuðu en Rakel vann fljótt boltann, brunaði upp hægri kantinn þar sem hún gaf fyrir markið. Hólmfríður Magnúsdóttir var þar mætt og skoraði gott mark.

Sannkölluð óskabyrjun fyrir íslenska liðið en engin fleiri mörk voru skoruð í fyrri hálfleik. Írar voru meira með boltann en náðu að skapa sér fá færi. Besta færið fengu Írar þegar sóknarmaður liðsins slapp í gegnum íslensku vörnina en María var þá vel á verði.

Rakel Hönnudóttir fékk einnig fínt skotfæri í fyrri hálfleik en skot hennar fór framhjá markinu.