Algjör einhugur í hópi ljósmæðra

Algjör einhugur er meðal ljósmæðra í kjarabaráttu þeirra að sögn Guðlaugar Einarsdóttur, formanns Ljósmæðrafélags Íslands, sem klukkan eitt í dag fundar með samninganefnd ríkisins um nýjan kjarasamning.

Vísir náði tali af Guðlaugu þar sem hún var að undirbúa samningafundinn. Aðspurð um stemmninguna í samningahópi ljósmæðra segir Guðlaug að hún sé afslöppuð og að þær fari í viðræðurnar með opnum huga. Ljósmæður hafi komið með margar hugmyndir að leiðum að sama markmiði, það er að leiðrétta kjör stéttarinnar.

Ljósmæður efndu til tveggja sólarhringa verkfalls í síðustu viku og annað slíkt hefst á miðnætti á miðvikudag hafi ekki samist fyrir þann tíma. Aðspurð um andann meðal ljósmæðra segir Guðlaug að algjör einhugur sé í hópnum, „Þetta er kjarabarátta sem við höfum staðið í svo árum skiptir og við erum búnar að fara í gegnum nokkra kjarasamninga til þess að fá okkar kjör leiðrétt. Nú er komið að algjörum vendipunkti og óljóst hvernig við mönnum stéttina á næstu árum ef við fáum launin ekki leiðrétt," segir Guðlaug.

Ljósmæðrum hafa borist stuðningsyfirlýsingar víðs vegar að úr samfélaginu á síðustu dögum. Aðspurð segir Guðlaug stuðninginn hafa mikla þýðingu fyrir ljósmæður. „Við erum þakklátar fyrir stuðninginn og hann gefur okkur staðfestu til að halda áfram," segir Guðlaug.