Sárnar að missa stæðin

Bílastæðum í miðbæ Reykjavíkur fækkar um 120 vegna framkvæmda sem nú eru að hefjast á svokölluðum Alþingisreit við Tjarnargötu. ,,Það er sárt að missa þessi stæði," segir Kolbrún Jónatansdóttir framkvæmdastjóri Bílastæðasjóðs Reykjavíkurborgar.

Bílastæðum mun ekki fjölga í miðbænum fyrr en að bílastæðakjallari undir fyrirhuguðu Tónlistar- og ráðstefnuhúsi sem nú rís við Geirsgötu verður tekið í notkun í desember á næsta ári. Kolbrún segir að í kjallaranum verði 1500-1800 bílastæði og þar af munu 250 stæði tilheyra Bílastæðasjóð.

Í tengslum við umræðu um hátt eldsneytisverð segir Kolbrún að hún sjái þess ekki merki að almenningur sé farinn að nota einkabílinn minna. ,,Tekjur Bílastæðasjóðs eru óbreyttar."