Heimta höfuð Eriksson

Fjölmiðlar í Mexíkó fóru ekki fögrum orðum um Sven-Göran Eriksson landsliðsþjálfara í dag eftir að liðið tryggði sér naumlega áframhaldandi þáttöku í undankeppni HM í gær.

Mexíkó tapaði fyrir Hondúras í gær en komst áfram á markamun á kostnað Jamaíka. Tveir leikmenn voru reknir af velli í 1-0 tapi liðsins, en það náði aðeins í eitt stig úr þremur útileikjum sínum í milliriðli 2 þar sem það gerði m.a. 2-2 jafntefli við Kanda og tapaði fyrir Jamaíka. Þetta þykir ekki viðunandi árangur í Mexíkó.

"Spörkum honum út - það kostar bara fjórar milljónir dollara," sagði eitt blaðanna og vísaði í klásúlu í samningi landsliðsþjálfarans sænska. "Blaðið mun með ánægju borga fyrsta dollarann."

Ráðning Eriksson var nokkuð umdeild á sínum tíma, en hann tók við af goðsögninni Hugo Sanchez sem rekinn var eftir að U-23 ára lið Mexíkó, sem einnig var undir hans stjórn, komst ekki á Ólympíuleikana síðasta sumar.

Landsliðsmarkvörðurinn Oswaldo Sanchez kom landsliðsþjálfaranum til varnar og bað um meiri tíma fyrir hann.

"Ég hef trú á Eriksson og liðið stendur á bak við hann. Það var súrt að tapa en við komumst samt áfram," sagði markvörðurinn.

Í Mexíkó eru það forsetar liðanna í fyrstu deildinni þar í landi sem ákveða hvort landsliðsþjálfarar eru ráðnir eða reknir og þeir koma saman og funda í næsta mánuði.